رباعيات من الحياة
..........
دنيتنا سكك ومفارق
ناس جاية وناس بتفارق
ناس لينا وجودها حياة
وناس تانية وجودها ما فارق
في الدنيا سكك ودروب
مشيناها شمال وجنوب
كام مرة زرعنا الخير
وكام مرة حصدنا ذنوب
في السكة قابلنا جبال
وعدينا تلال وبحور
ومشينا ساعات في رمال
وساعات في طريق مبتور
في السكة وقعنا كتير
وكملنا الحياة مشاوير
وساعات كنا نطير
بجناحنا كما العصافير
في السكة ياما شفنا حدود
وحلم وطريق مسدود
وناس تقول حرية
وناس متكبلين بقيود
في السكة ياما لقينا جعان
من حاله ما هو غصبان
وفي السكة ياما شفنا غيلان
ما عرفت قلوبها امان
في السكة ياما سمعنا حكاوي
عن عشق وغرام وغناوي
وحبيب حب حقيقي
وحبيب على الخداع كان ناوي
في السكة ياما عرفنا رجال
ما تتاقل في يوم بالمال
وفي السكة قابلنا عيال
عايشين الحياة اندال
للسكة اكيد بدايات
والدنيا لازم تنفات
وان عشت مهما اعيش
في الاخر حيقولوا دا مات
يارب ادينا عايشين
وفي الدنيا كده ماشين
يارب اهديلنا طريقنا
وارحمنا في يوم الدين
يحيى حسين
23 يناير 2019
ليست هناك تعليقات:
إرسال تعليق